黃宗澤楊崢

現年33歲的無綫小生黃宗澤可謂圈中筍盤，昨日本報收到可靠消息，指Bosco與現年38歲的名模楊崢秘密譜出「姊弟戀」兼拍拖三個月！據知二人早於幾年前認識，一直保持聯絡，直至Bosco與杏兒分手，加上Bosco開蠔吧，他倆因同樣愛煮嘢食，故經常研究烹飪，經多次接觸後擦出愛火！有指愛得高調的他倆已非常公開，私底下不時以情侶姿態出席朋友聚會，Bosco更在老友面前大讚女友夠真及不注重物質。

粉絲以為拍戲

愈愛愈高調的二人，甚至被目擊在前日約下午3時許，在西貢市中心拍拖「行大運」，由於當日是公眾假期加上是大年初四，西貢人頭湧湧，二人毫不避忌在街上拖手行街街，戴黑超及冷帽的Bosco被途人一眼認出，而未有戴上黑超的楊崢則穿上紅褲，非常搶眼。他倆有講有笑，懶理途人目光，公然十指緊扣晒幸福，楊崢面上又不時露出冧爆笑容，與一般熱戀中的情侶並無兩樣。打得火熱的二人其後拖到實步入餅店，楊崢情到濃時更小鳥依人，親手餵Bosco食曲奇，甜蜜之情不言而喻。據目擊者稱，當時不少途人均以為他倆在拍戲，即惹來逾二十人在餅店外「(目及)嘢」，不過細看之下卻未有發現拍攝器材，有Bosco粉絲更在現場不停大嗌：「Bosco！」不過他倆卻未有理會，繼續沉醉於幸福之中。

「有發展空間」

本報昨日致電求證，他倆均未有否認，Bosco更甜笑表示：「一切醞釀中，互相了解緊，畀啲發展空間我哋，佢係好好嘅女仔，好聰明，識咗好多年，之前私底下冇聯絡，不過大家有共同興趣，鍾意煮嘢食（試佢手勢？）未。（你煮畀佢食？）我都想。（咁公開拍拖？）正常社交活動，一齊食嘢啫！（咁細塊都一齊食？）食嘢梗係細細啖啦！（好唔好味？）好好味！」問到可會介意姊弟戀，Bosco說：「冇所謂，最緊要溝通到，同互相畀到正能量大家就得。」他又透露未有到楊崢家中拜年。

至於楊崢亦大讚Bosco有上進心及孝順，又承認彼此有很多共同興趣，問到可會公開戀情，她說：「我一向對感情都好低調，唔想講咁多，Bosco係好男仔，我相信佢係好男朋友。」不過提到在西貢公然拖手，為何仍不肯公開，她則語帶輕鬆地說：「呢條問題唔答。」

新歡楊崢

年齡︰38歲

三圍︰34B、24、35

身高︰1米75

學歷：香港嶺南大學會計系畢業

事業︰國際名模，1995年由朋友介紹入行拍廣告，其後又奪得超級模特兒大賽冠軍，2012年更成為韓國國際榮譽大使，為當地推廣旅遊業，近年她出飲食書又寫專欄，並於電台主持節目。

舊愛杏兒

年齡︰34歲

三圍︰32.5B、23、33.5

身高︰1米72

學歷：香港科技大學生化系

事業︰1999年參選港姐，奪得季軍後加入無綫，其後密密拍劇成為當家花旦，代表作有《我的野蠻奶奶》及《肥田囍事》等，2011年憑劇集《怒火街頭》勇奪無綫視后。