CY廁紙
一年一度嘅年宵即將開幕，各大政黨又嚟分一杯羹，為咗可以將政治「帶入屋」，大家推出實用又好玩嘅產品。民主黨整咗印有特首梁振英（CY）嘜頭嘅「廁紙一狼」衛生紙，大家可以用嚟抹嘴；公民黨就有「公民袋」；工黨就有歌手黃耀明親筆簽名嘅彩虹旗文件夾。全部都係手快有手慢無。
民主黨嘅「廁紙一狼」，係一套4卷分別印上CY同「路福西」頭像嘅廁紙。民主黨話政治要入屋，所以設計家庭用品，佢哋話廁紙品質好，好似CY面皮咁厚，仲話可以拎卷去畀關心公廁廁紙夠唔夠白嘅工聯會王國興，睇吓合唔合格。點賣呀？$68.9四卷，唔好話貴呀，佢哋話得1000套，反應好仲可能會加價。
公民黨賣「公民袋」一向被笑稱為「公民袋」嘅公民黨，就一於設計袋，黨魁梁家傑仲揮毫寫上「我是一個公民袋」，$98一個。公民黨仲會舉行「普選對聯創作比賽」，市民可發揮創意，創作普選為題嘅七字對聯，最優秀嘅3份作品可以得到主席余若薇揮毫。
工黨就推出大愛彩虹旗同六四晚會文件夾，佢哋仲分別搵咗黃耀明同學運領袖王丹簽名，每款限量100個嘅簽名版賣$100一個，普通版就賣$20。新民主同盟就推出佔中T恤同摺櫈。另外，民建聯早前宣布會推出$68一個嘅福袋，有米粉同豆豉鯪魚等食物，仲有數碼收音機。
